МЕКТЕП ТАРИХЫ

Еңсесін енді көтеріп келе

                                                   жатқан біздің еліміз үшін

                                                            дарынды ұрпақтың орны бөлек

                                                                                        Н.Ә.Назарбаев

    Дарындылық – адамның өз бейімділігі арқылы, шығармашылықпен жұмыс істеу арқылы қалыптасатын қасиет. Баланың дарындылығын анықтаудың негізі мектептен басталады. Әр баланың бойында табиғат берер ерекше қабілеті, дарындылығы болады. «Бұлақ көрсең, көзін аш» дегендей, осындай баланың бойындағы дарындылық қасиетін дамыту - көбіне мұғалімдердің кәсіби біліктілігіне байланысты екендігі айдан анық. Кентау қаласында орналасқан, облыс білім саласында өзінің айшықты орны бар, облыс, республика, тіпті алыс-жақын шет мемлекеттерде облысымыздың абыройын биікке көтеріп жүрген Түркістан облысы адами әлеуетті дамыту басқармасының «Мамандандырылған «Дарын» мектеп-интернаты» сол кезеңдегі облыс әкімі  Б.Сапарбаевтың нұсқауымен  2001 жылдың қыркүйек айында ашылды. Мектептің негізгі тереңдететін бағыты - заманауи үлгідегі жаратылыстану-математикалық бағыт.  Мектептің жұмысты бастаған алғашқы күнінен бастап алға қойған мақсаты: интеллектуалды және шығармашылық дарынды, жан-жақты дамыған және ізгілікті тәрбиелі, өз пікірін қорғайтын әрі ойлана алатын, белсенді азаматтық тұлғаны тәрбиелеп, қалыптастыру еді. 

Мектептің оқушылар құрамын шалғай жатқан аудандардан келген, атап айтар болсақ, Созақ, Отырар, Бәйдібек, Түркістан аудандарынан, Қызылорда,  Алматы, Тараз облыстарынан келген балалар құрайды.  Түкпір ауылдардың балаларының ішінен дарындылық қабілеті жоғары балаларды жинап, білім беруде мектептің алған жауапкершілігі зор болды. Сол кезеңде мектептегі білім берудің негізгі принциптері: бала бойындағы дарындылықты ашу,  бала өзі оқитындықтан, білім алу оған қуаныш сыйлауы керек, баланы асықтырмай, қай салада жетістіктерге жете алса, сол сала бойынша еңбектенуіне жағдай жасау болды.

        2011 жылдан бастап мектепті  Кентау қаласының  «Ең үздік ұстазы», математика пәнінің мұғалімі, олимпиада жеңімпаздарының жетекшісі болған, ҚР Білім беру ісінің үздігі  Бадырова  Нұргүл Есқалиқызы басқарып келеді. Соңғы оқу жылдарының нәтижесі бойынша мектеп-интернаты Қазақстан Республикасындағы "Ең үздік 10 мектеп" қатарынан көрініп, Қазақстан Республикасы Білім және Ғылым министрінің "Білім беру жүйесіндегі Ұлттық бірыңғай тестілеуді ұйымдастыру мен өткізудегі елеулі еңбегі мен мектептің жоғары көрсеткіштері үшін" алғыс хатымен марапатталған.

       Кентау қаласындағы «Мамандандырылған «Дарын» мектеп-интернатының» ұстаздары да оқушылардың дарындылығын анықтау мен оны дамыту жолында жан-жақты шығармашылықпен заманауи үлгіде еңбек етуде. Бұған мектептің олимпиадалық, конкурстық және ҰБТ жетістіктерінің дәлелі бір төбе десек, мектеп-интернатты бітірген әрбір түлектің кәсіби бағдар беру арқылы қол жеткізген сәтті болашағы - бірден-бір дәлел. Оқушылардың дарындылығын танытатын  сайыстар мен сынақтар жыл сайын облысымыздың мәртебесін көтеруде жемісін берсе, бала бойындағы дарындылықты ашу арқылы жүргізілген еңбектің арқасында түлектеріміз еліміздің атын шет мемлекеттерде танытып келеді.

Мектеп оқушылары өздерінің интеллектуалдық, танымдық қабілеттерін ғылыми жоба жұмыстарын жазу арқылы түрлі облыстық, республикалық, халықаралық сайыстарға жыл сайын қатысып, жүлделі орындарды иеленеді.

Соңғы 3 жылдың ішінде, атап айтар болсақ, 2016-2021 жылдар аралығында  оқушылардың ғылыми жоба жұмыстарының облыстық кезеңінде 181 оқушы І,ІІ,ІІІ орындарға ие болса, 62 оқушы мақтау қағаздарымен марапатталды. Республикалық кезеңінде 53 оқушы ІІ,ІІІ орындарға ие болса, 19 оқушы финалист медальдарымен  және 35 оқушы мақтау қағаздарымен марапатталды. Сонымен қатар осы үш жылдың ішінде мектеп оқушылары Халықаралық механика және математикадан зерттеу жұмыстары халықаралық конкурсына 22 оқушы қатысып, 6 оқушы І орын, 11 оқушы ІІ орынға,  2 оқушы мақтау қағаздарымен марапатталып, облысымыздың мәртебесін көтерді.

       Оқушыларымыз өздерінің интеллектуалды және шығармашылық қабілеттерін пәндік олимпиадаларға қатысу арқылы да танытып келеді. Жалпы білім беретін пәндер бойынша облыстық, республикалық, халықаралық олимпиадаларда мектеп оқушылары белсенділік танытып, жүлделі орындарды иеленуде. 2017-2021 оқу жылдарының қорытындысы бойынша Республикалық пән олимпиадасының облыстық кезеңінде 67 оқушы алтын, күміс, қола медальдарға ие болса, 24 оқушы мақтау қағаздармен марапатталды. Республикалық кезеңде 10 оқушы алтын, күміс, қола медальдарына ие болды және 8 оқушы мақтау қағазымен марапатталды. Жыл сайын Теміртау қаласында математика бағытындағы пәндер бойынша республикалық Президенттік олимпиада 11-сынып оқушылары бақтарын сынап келеді. Сонымен қатар оқушыларымыз жыл сайын Назарбаев Зияткерлік мектебі базасында өткізілетін "Наурыз кездесулері" атты ғылыми конеренцияға белсене қатысып, шығармашыл оқушылар ретінде бағалы сыйлықтар мен сертификаттарға ие болып келді. Сонымен қоса әр пәндерден өткізілетін интернет олимпиадаларға да оқушыларымыз белсенді қатысып, жүлделі орындарды иеленуде.

Мектеп-интернатта 49 мұғалім жұмыс жасайды. Оның ішінде ғылыми/академиялық  дәрежесі бар педагогтердің үлесі – 30,6%.                                                                                                                       

          Қазіргі таңда осы мектепті аяқтаған түлектер тек қана Қазақстанның таңдаулы жоғарғы оқу орындарында ғана емес, АҚШ, Ресей, Қытай, Ұлыбритания, Франция, Түркия, Германия, Корея елдерінде білімдерін жалғастыруда. Шет мемлекеттерде білім алған түлектердің бірқатары қазіргі таңда елімізге келіп, алғашқы қызметтерін көрсетуде.                  

         Мектепішілік бақылау мен дамуды ұйымдастырудағы инновациялық тәсілдер жан-жақты қарастырылған. Соның бірі - жан-жақты тәжірибе алмасу. Аталған мектеп-интернат «МЕКТЕП+МЕКТЕП жобасы» бойынша ауылдық жерде орналасқан №5 Абай атындағы жалпы орта мектебін жетекшілігіне алып, ҚР білім және ғылым министрлігінің 2020 жылы шыққан «Жетекшілік технологиясы: жетекшілік жасаудың вариативті моделін қолдану»  әдістемелік нұсқаулығы бойынша «Көмектаймс» жобасын іске асыра отырып, көмек беру жүйесі де қарқынды жұмыс істеуде. «Назарбаев Зияткерлік мектептері» ДББҰ Шымкент қаласындағы химия-биология бағытындағы «Назарбаев Зияткерлік мектебі» филиалымен бірлесе іс-тәжірибе тарату мақсатында мұғалімдердің кездесуі, семинарлар ұйымдастырады. «МЕКТЕП+КОЛЛЕДЖ жобасы» бойынша Швейцария елінің Лейзин қаласында орналасқан Халықаралық «Білім беру жүйесіндегі инновациялық және заманауи технологиялар» колледжімен онлайн сабақтар жүргізуді ұйымдастырған.  «МЕКТЕП+УНИВЕРСИТЕТ жобасы» бойынша Түркістан қаласындағы Қ.А.Ясауи атындағы Халықаралық қазақ-түрік университетімен ғылыми-жобалар, олимпиадалық есептерді шығару және іс-тәжірибелік жұмыстарды бірлесе атқару жұмыстары бойынша келісімшарт негізінде, Алматы қаласындағы «Қ.И.Сатбаев атындағы Қазақ Ұлттық Техникалық Университетімен» және Томск қаласындағы Томск университетімен түлектерімізге кәсіби бағдар беру мақсатында жұмыстар жүргізілуде. «МЕКТЕП+ӘДІСДЕМЕЛІК КӨМЕК ОРТАЛЫҚТАРЫ» жобасы бойынша Шымкент қаласындағы Педагогикалық шеберлік орталығы тренерлері және «Өрлеу» біліктілік арттыру орталығы тренерлері, ЖШС U-Future (Ustady аймақтық тест орталығы) МЕМОРАНДУМ жасап, жұмыс жасау жүйесін қарқынды дамытуда.

        Жалпы мектебімізде суырылып, "Жүзден жүйрік, мыңнан тұлпар" атанған дарынды оқушыларымыз жеткілікті. Міне, осындай биік жетістіктерге қол жеткізген дарынды шәкірттеріміз өздерінің жоғары дәрежедегі ерекшеліктерін мықты тағылыммен ұштастыратын қоғам қайраткері болары анық. Егеменді елімізді дүние жүзі елдерімен терезесі тең болатын дәрежеде өркендетіп, оның тұтқасын, тізгінін ұстайтын, сол арқылы елімізді әлемге танытатын да біздің дарынды, қабілетті ұл-қыздарымыз болмақ. 

       Әр апта сайын жетекшілік ететін бағыт бойынша ақпаратты әлеуметтік желілерде https://www.youtube.com/channel/UCv2zF2Ki6o57NFR7HPTLEtw Кентау Дарын интеллект: ғылыми жобалар, видео сабақтар  https://www.facebook.com/groups/1495058230656070 фейсбук «Кентау Дарын мектеп-интернаты»: мектеп жаңалықтары жарияланып отырады